Türkiyə Prezidenti Rəcəb Tayyib Ərdoğan Ukrayna səfiri Nəriman Cəlalı qəbul edib.

“unudulmaz.az” “Anadolu” agentliyinə istinadən xəbər verir ki, qəbulda Ukraynanın Türkiyədəki səfiri etimadnaməsini Ərdoğana təqdim edib.

Türkiyə lideri, həmçinin Slovakiya, Özbəkistan və Əlcəzair səfirlərini də qəbul edib.

Xatırladaq ki, Krım Tatar Xalq Məclisi sədrinin eks-müavini Nəriman Cəlal 2021-ci ilin sentyabrında Rusiya təhlükəsizlik qüvvələri tərəfindən təxribat ittihamı ilə saxlanılıb. 2024-cü ilin iyununda əsir mübadiləsi nəticəsində azad edilib və Ukraynaya qayıdıb. Bu ilin may ayında isə Ukrayna Prezidenti Volodimir Zelenski onu ölkənin Türkiyədəki səfiri təyin edib.

Qeyd edək ki, N. Cəlal eyni zamanda jurnalist və hüquq müdafiəçisidir. O, 2014-cü ildə Krımın Rusiya tərəfindən ilhaqından sonra yarımadada qalıb, Krım tatarlarının və ukraynalıların hüquqlarını fəal şəkildə müdafiə edib.