Suraxanı Rayon İcra Hakimiyyəti başçısı Adil Əliyevin növbəti səyyar görüşü Hövsan qəsəbəsinin sakinləri ilə keçirilib.

“unudulmaz.az” xəbər verir ki, Adil Əliyevin 270 nömrəli tam orta məktəbdə keçirilən qəbulunda RİH başçısının müavinləri və şöbə müdirləri, qəsəbə nümayəndəsi və bələdiyyə sədri, dövlət orqanlarının yerli idarələrinin və xidmət sahələrinin rəhbərləri, qəsəbə sakinləri iştirak ediblər.

A.Əliyev ölkəmizin beynəlxalq arenada gündən-günə artan nüfuzundan, ölkədə həyata keçirilən islahatlardan, eləcə də rayon ərazisində aparılan abadlıq-quruculuq işlərindən ətraflı məlumat verib.

Daha sonra ayrı-ayrı sahələrə dair qəsəbə sakinləri tərəfindən irəli sürülən müraciət, təklif və şikayətlər qeydə alınaraq rayon İcra Hakimiyyəti başçısının göstərişi ilə həlli istiqamətində lazimi tapşırıqlar verilib.

Qəsəbə sakinləri çıxış edərək rayon icra başçısının qəsəbələrdə səyyar görüşlərinin keçirilməsinin çox böyük əhəmiyyət daşıdığını, əhali tərəfindən irəli sürülən təkliflərin reallaşmasında və problemlərin həll olunmasında müstəsna kömək etdiyini söyləyib və göstərilən diqqət və qayğıya görə minnətdarlıqlarını bildiriblər.